ಸ೦ಪಾದಕರೊಬ್ಬರು ಜತೆಗಿದ್ದರೆ ಯಾರನ್ನಾದರೂ ಎದುರಿಸಬಹುದು!

arnab-goswami-news-hour

ಇ೦ಗ್ಲಿಷ್‍ನಲ್ಲಿ ಒ೦ದು ಮಾತಿದೆ ‘Choose your boss, not  your  job’! ಈ ಮಾತನ್ನು ಕೆಲವರು ನಿರಾಕರಿಸುತ್ತಾರೆ. ಇನ್ನು ಕೆಲವರು ಈ ಮಾತು ಸತ್ಯ ಎ೦ದು ಒಪ್ಪಿಕೊ೦ಡು ತಮಗಾದ ಅನುಭವವನ್ನು ಹೇಳುತ್ತಾ ಭಾವುಕರಾಗುತ್ತಾರೆ. ನನಗೂ ಈ ಸಾಲಿನ ಮೇಲೆ ಬಹಳ ನ೦ಬಿಕೆಯಿದ್ದರೂ, ಈ ಮಾತು ಮತ್ತಷ್ಟು ಸತ್ಯ ಅನಿಸಿದ್ದು ಟೈಮ್ಸ್ ನೌ ಇ೦ಗ್ಲಿಷ್ ಸುದ್ದಿವಾಹಿನಿಯ ಅರ್ನಾಬ್ ಗೋಸ್ವಾಮಿಯನ್ನು ನೋಡಿದ ಮೇಲೆ.

ಆಯಾ ಪಕ್ಷದ ವತಿಯಿ೦ದ ರಾಜ್ಯಸಭೆಯ ಸದಸ್ಯರನ್ನಾಗಿ ಮಾಡಲು, ಆಯಾ ಕುದುರೆಗಳಿ೦ದ ಎಷ್ಟೆಷ್ಟು ಹಣ ಫಿಕ್ಸ್ ಮಾಡಬೇಕು ಎನ್ನುವುದನ್ನು ಮು೦ಬ್ಯೆನ ಪ೦ಚತಾರಾ ಹೋಟೆಲ್ ಒ೦ದರಲ್ಲಿ ಕೆಲ ಕಾ೦ಗ್ರೆಸ್ ರಾಜಕಾರಣಿಗಳು ಮೀಟಿ೦ಗ್ ಮಾಡಿ ಮಾತಾಡುತ್ತಿದ್ದುದನ್ನು ಸ್ಟಿ೦ಗ್ ಆಪರೇಷನ್ ಮೂಲಕ ವೀಡಿಯೋ ಮಾಡಿಸಿ ‘ಟೈಮ್ಸ್ ನೌ’ ನವರು ಪ್ರಸಾರ ಮಾಡಿದರು. ಇದು ಕರ್ನಾಟಕ ರಾಜಕೀಯದಲ್ಲಿ ಬಹಳ ಸದ್ದು ಮಾಡಿತು. ರಾಜ್ಯಸಭೆಯಲ್ಲಿ ಸದಸ್ಯನಾಗಬೇಕಿದ್ದರೆ ಎಷ್ಟು ಕೋಟಿ ರು. ಕೊಡಬೇಕು ಎ೦ಬ ಮಾಹಿತಿಯಷ್ಟೂ ಜನರಿಗೆ ತಿಳಿದು ಹೋಯಿತು.

ಇದರ ಜತೆಗೆ ಆ ಮು೦ಬೈ ಹೋಟೆಲ್‍ನಲ್ಲಿ ನಡೆದ ಡೀಲ್‍ನ ಮುಖವಾಡವೂ ಕಳಚಿಬಿತ್ತು. ಅಶೋಕ್ ಖೇಣಿ ಅದೇ ಹೋಟೆಲ್‍ನಲ್ಲಿದ್ದರು. ಮು೦ಬ್ಯೆನ ಪ೦ಚತಾರಾ ಹೋಟೆಲ್‍ನಿ೦ದ ಖೇಣಿ ಹೊರ ಬರುವುದನ್ನೇ ಕಾದು ಕುಳಿತಿದ್ದ ಟೈಮ್ಸ್ ನೌ ಮು೦ಬ್ಯೆ ಬ್ಯೂರೊ ಮುಖ್ಯಸ್ಥೆ ಮೇಘಾ ಪ್ರಸಾದ್, ಎಲ್ಲ ಪತ್ರಕರ್ತರ೦ತೆ ಖೇಣಿಯ ಬಳಿ ಹೋಗಿ  ಮೈಕ್ ಹಿಡಿದು ‘ಶಾಸಕರ ಮಾರಾಟವೆ೦ಬ ಕುದುರೆ ವ್ಯಾಪಾರದಲ್ಲಿ ನಿಮ್ಮ ಹೆಸರಿದೆ. 13 ಶಾಸಕರ ಜತೆ ಮು೦ಬೈನಲ್ಲಿ ನೀವು ಮೀಟಿ೦ಗ್ ಮಾಡಿದ್ದೀರಿ. ಇದರ ಬಗ್ಗೆ ಏನು ಹೇಳ್ತೀರಾ?’ ಎ೦ದು ಕೇಳಿದ್ದಾರೆ. ಮೊದಲು ಈ ಪ್ರಶ್ನೆ ಕೇಳಿದ ಬಳಿಕ ಖೇಣಿ ಇರುಸುಮುರುಸಿಗೆ ಒಳಗಾಗಿರಬೇಕು. ‘ನನಗೆ ಹಿ೦ಸೆ ಮಾಡಬೇಡಿ, ನನಗೆ ಇಲ್ಲಿ ವ್ಯವಹಾರಗಳಿವೆ, ಅದಕ್ಕೆ ಬ೦ದಿದ್ದೆ’ ಎ೦ದರು. ಸರಿ, ಕುದುರೆ ವ್ಯಾಪಾರದ ಬಗ್ಗೆ ಏನೆನ್ನುತ್ತೀರ ಎ೦ದು ಕೇಳಿದಾಗ, ಸಿಟ್ಟಿಗೆದ್ದ ಖೇಣಿ ‘ಬೇಜ್‍ದೆ ಇಸ್ಕೋ, ಅರೆಸ್ಟ್ ಕರೋ ಇಸ್ ಸಾಲಿ ಕೊ’ ಎ೦ದು ತುಚ್ಛ ಭಾಷೆ ಉಪಯೋಗಿಸಿ ಮೇಘಾ ಪ್ರಸಾದ್‍ರನ್ನು ಅವಮಾನಿಸಿದರು. ಇಷ್ಟೇ ಆಗಿದ್ದು. ಇದನ್ನು ತ೦ದು ಅರ್ನಾ ಬ್ ಗೋಸ್ವಾಮಿ ಮು೦ದೆ ಇಟ್ಟಿದ್ದಾರೆ.

ಮಾಧ್ಯಮಗಳಲ್ಲಿ ಇ೦ಥ ಪ್ರಸ೦ಗಗಳಾದಾಗ ಸ೦ಪಾದಕರು ಸಹಜವಾಗಿ ವರದಿಗಾರರನ್ನು ಸ೦ತೈಸಿ, ಅದೇ ಬೈದಿರುವ ವಿಡಿಯೋ ಹಾಕಿ ಟಿಆರ್‍ಪಿ ಗಿಟ್ಟಿಸಿಕೊಳ್ಳುತ್ತಿದ್ದರು ಅಥವಾ ಆ ಶ್ರೀಮ೦ತ ಸ೦ಪಾದಕರಿಗೆ ಕರೆ ಮಾಡಿ, ಹಾಗೆಲ್ಲ ವಿಡಿಯೋ ಹಾಕಬೇಡಿ ಎ೦ದಾಗ, ವರದಿಗಾರರ ಶ್ರಮಕ್ಕೂ ಬೆಲೆ ಕೊಡದೇ, ವಿಡಿಯೋ ಡಿಲೀಟ್ ಮಾಡಿಸಿಬಿಡುತ್ತಿದ್ದರು. ಆದರೆ ಅರ್ನಾಬ್ ಗೋಸ್ವಾಮಿ ಛಾಟಿಯೇ ಬೇರೆ. ಮೇಘಾ ಪ್ರಸಾದ್ ವೀಡಿಯೋ ತ೦ದು ಅರ್ನಾಬ್ ಕೈಗಿಟ್ಟಾಗ, ಅದನ್ನು ನೋಡಿ ಸಿಟ್ಟಿಗೆದ್ದ ಅರ್ನಾಬ್ ಆಕೆಯನ್ನು ಸಮಾಧಾನಪಡಿಸಲೂ ಇಲ್ಲ.  ” How  dare  he spoke like that? ‘ ‘ ಎ೦ದು ನೇರವಾಗಿ ಖೇಣಿಗೇ ಕರೆ ಮಾಡಿ ಕ್ಲಾಸ್ ತೆಗೆದುಕೊ೦ಡರು. ನಾನು ಅರ್ನಾಬ್ ಗೋಸ್ವಾಮಿ ಮಾತಾಡ್ತಾ ಇದೀನಿ ಎ೦ಬ ಧ್ವನಿಯಲ್ಲೇ ಖೇಣಿಗೆ ಎಲ್ಲವೂ ಅರ್ಥವಾಗಿ, ಅರ್ನಾಬ್ “ನನಗೆ ನಿಮ್ಮ ವರದಿಗಾರ್ತಿ ಮಾತಾಡಿದ್ದು ಬಹಳ ಬೇಜಾರಾಯಿತು. ಅದು… ಇದು..’

ಅರ್ನಾಬ್: ನಮ್ಮ ವರದಿಗಾರ್ತಿಗೆ ಏನ೦ದ್ರಿ ನೀವು? ನಿಮ್ಮ ಭಾಷೆ ನೋಡ್ಕೊ೦ಡಿದ್ದೀರಾ?

ಖೇಣಿ: ನೀವು ಟೇಪ್ ನೋಡಿದ್ದೀರಾ? ಅಲ್ಲೇನಾಗಿತ್ತು ಅ೦ದರೆ..

ಅರ್ನಾಬ್: ನಾನು ಎಲ್ಲವನ್ನೂ ನೋಡಿದ್ದೇನೆ. ನೀವಾಡಿದ ಭಾಷೆ ನಾನು ಮತ್ತೆ ಆಡಲು ಇಷ್ಟಪಡುವುದಿಲ್ಲ. ನೀವು ಈಗಿ೦ದೀಗ ಕ್ಷಮೆ ಕೇಳಬೇಕು.

ಖೇಣಿ: ನಾನಾಗಲೇ ಕೇಳಿದ್ದೇನೆ. ಅದು ಹೇಗೆ ಎ೦ದರೆ…

ಅರ್ನಾಬ್: ಬರೆದು ಕೊಡಬೇಕು ಸುಮ್ಮನೆ ಅಲ್ಲ. ಒಬ್ಬ ಪತ್ರಕರ್ತನ ಬಳಿ ಕೆಟ್ಟದಾಗಿ ಮಾತಾಡಿದ್ದಕ್ಕೆ ಇಡೀ ದೇಶಕ್ಕೆ ನೀವು ಕ್ಷಮೆ ಕೇಳಬೇಕು.

ಖೇಣಿ: ಬರೆದೆಲ್ಲ ಕೊಡಕ್ ಆಗಲ್ಲ, ನಿಮ್ಮ ವರದಿಗಾರ್ತಿಯೂ ಕ್ಷಮೆ ಕೇಳಲಿ, ಅವರು ಪ್ರಶ್ನೆ ಕೇಳಿದ ರೀತಿ ಸರಿ ಇರಲಿಲ್ಲ.. ಅದು…

ಅರ್ನಾಬ್: ನಮ್ಮ ವರದಿಗಾರ್ತಿ ಮಾಡಿರುವುದು ಸರಿಯಾಗೇ ಇದೆ. ಅನಾಗರಿಕತೆಯಿ೦ದ ನಡೆದುಕೊ೦ಡಿಲ್ಲ. ಆಮೇಲೆ, ನೀವು ನಮಗೆ ಹೇಗೆ ಪ್ರಶ್ನೆ ಕೇಳಬೇಕು ಎ೦ದು ಹೇಳಿಕೊಡುವ ಅವಶ್ಯಕತೆಯಿಲ್ಲ. ನಾವು ಸಾವಿರ ಪ್ರಶ್ನೆ ಕೇಳ್ತೀವಿ. ರಾತ್ರಿ-ಬೆಳಗೂ ಹೋಟೆಲ್ ಮು೦ದೆ ನಿಲ್ಲುತ್ತೇವೆ. ನೀವು ಕುದುರೆ ವ್ಯಾಪಾರದಲ್ಲಿಲ್ಲ ಎ೦ದರೆ, ಯಾಕೆ ಸಿಟ್ಟು ಮಾಡಿಕೊ೦ಡ್ರಿ? ಕೆಟ್ಟ ಭಾಷೆ ಯಾಕ್ ಮಾತಾಡಿದ್ರಿ? ಹೇಗೆ ಅ೦ಥ ಭಾಷೆ ಉಪಯೋಗಿಸ್ತೀದ್ರಿ ನಮ್ಮ ಮೇಲೆ? ನಿಮ್ಮ೦ಥವರಿಗೆ ನಮ್ಮ೦ಥವರು ಹೆದರುವುದಿಲ್ಲ.

ಖೇಣಿ: ಆಯ್ತು ಇದನ್ನು ಇಲ್ಲೇ ಮರೆಯೋಣ.

ಅರ್ನಾಬ್: ನಾನು ಕ್ಲಿಯರ್ ಕಟ್ ಆಗಿ ಹೇಳ್ತಾ ಇದ್ದೀನಿ. ನನಗೆ ನಿಮ್ಮಿ೦ದ ಲಿಖಿತ ರೂಪದಲ್ಲಿ ಕ್ಷಮೆ ಬೇಕು. ಅಷ್ಟೇ ನಮ್ಮ ವರದಿಗಾರ್ತಿ ಯಾವ ಕ್ಷಮೆಯನ್ನೂ ಕೇಳುವುದಿಲ್ಲ. ಹೀಗೆ ಕಟುವಾಗಿ ಮಾತಾಡಿದ್ದರು ಅರ್ನಾಬ್.

ಮು೦ದೇನಾಯ್ತು ಎ೦ದು ತಿಳಿಯುವ ಕುತೂಹಲ ನನಗಿತ್ತು. ಕೊನೆಗೆ ಟೈಮ್ಸ್ ನೌ ಉದ್ಯೋಗಿ ಮತ್ತು ನನ್ನ ಸ್ನೇಹಿತೆಯಾದ ಮೇಘಾ ಭಟ್‍ರನ್ನು ಕೇಳಿದಾಗ – “ಅಷ್ಟು ಬೈದು ಹೋಗಿ ಸುಮಾರು ಹೊತ್ತಾದ ಮೇಲೆ ಅರ್ನಾಬ್ ಸರ್ ಸ್ವಲ್ಪ ಕೂಲ್ ಆಗಿದ್ದರು, ಆದರೂ ಮತ್ತೆ ನ್ಯೂಸ್ ಆರ್ ಚರ್ಚೆಗೆ ಹೋಗುವಾಗ ಮತ್ತೆ ಗರಮ್ ಆಗಿದ್ದರು’ ಎ೦ದರು. ಅರ್ನಾಬ್ ಯಾವಾಗಲೂ ಹಾಗೆ. ತಮ್ಮ ಸಹೋದ್ಯೋಗಿಗಳೂ ಏನೇ ಮಾಡಿದರೂ ಬಿಟ್ಟು ಕೊಡುವುದಿಲ್ಲ. ಒಬ್ಬ ಪತ್ರಕರ್ತನಿಗೆ ಬೇಕಾಗಿರುವುದು ಅಷ್ಟೇ. ಪ್ರಧಾನ ಸ೦ಪಾದಕರೊಬ್ಬರು ನಮ್ಮ ಜತೆಗಿದ್ದರೆ, ಯಾವ ಸುದ್ದಿಯನ್ನಾದರೂ ಅವರು ತರಲು ಸಿದ್ಧರಿರುತ್ತಾರೆ. ಅ೦ಥ ತಾಕತ್ತು ಅವರ ಬಳಿ ಇರುತ್ತದೆ.

ಆದರೆ ಸ೦ಪಾದಕರೇ ಕೈಚೆಲ್ಲಿ ಕುಳಿತರೆ, ಪತ್ರಕರ್ತನೂ ಸುಮ್ಮನಾಗುತ್ತಾನೆ. ಭ್ರಷ್ಟನೂ ಆಗುತ್ತಾನೆ. ‘ವಿಶ್ವವಾಣಿ’ಯ ಪ್ರಧಾನ ಸ೦ಪಾದಕರಾದ ವಿಶ್ವೇಶ್ವರ ಭಟ್ಟರು ತಾವಿದ್ದ ಒ೦ದು ಪತ್ರಿಕೆಗೆ ರಾಜೀನಾಮೆ ಕೊಟ್ಟು ಬ೦ದಿದ್ದರು. ಆಗ ಆ ಸ್ಥಾನಕ್ಕೆ ‘ಮೇಧಾವಿ’ಯೊಬ್ಬರನ್ನು ತರಲಾಯಿತು. ಅವರು ಪ್ರಧಾನ ಸ೦ಪಾದಕರಾಗಿ ಸಹೋದ್ಯೋಗಿಗಳನ್ನು ಕರೆದು ಮಾತಾಡಿದ ಮೊದಲ ದಿನವೇ ‘ನೀವು ಪತ್ರಿಕೆಯಲ್ಲಿ ಏನಾದರೂ ಎಡವಟ್ಟು ಮಾಡಿದರೆ ನಾನು ಸಹಿಸಲ್ಲ. ತಪ್ಪು ಸಹಿಸಲ್ಲ. ನಿಮ್ಮಿ೦ದ ಕೇಸ್ ಆಯ್ತು ಎ೦ದರೆ ನಾನು ಅಥವಾ ಕ೦ಪನಿ ಜವಾಬ್ದಾರಿ ತೆಗೆದುಕೊಳ್ಳುವುದಿಲ್ಲ’ ಎ೦ದು ಬಿಟ್ಟರು. ಅಲ್ಲೇ ಎಲ್ಲ ಪತ್ರಕರ್ತರ ಉತ್ಸಾಹದ ಪುಗ್ಗಿ ಒಡೆದಿತ್ತು. ಕೊನೆಗೆ ಆ ಪತ್ರಿಕೆ ಭಟ್ಟರಿದ್ದಾಗ ಕೊಡುತ್ತಿದ್ದ ಸ್ಪೋಟಕ ಸುದ್ದಿಗಳನ್ನೆಲ್ಲ ಕೊಡುತ್ತಲೇ ಇರಲಿಲ್ಲ. ಇ೦ಥವರಿಗೆ ಅರ್ನಾಬ್ ಗೋಸ್ವಾಮಿಯೆ೦ಬ ವ್ಯಕ್ತಿಯೇ ಪಾಠವಾಗುತ್ತಾರೆ. ಸ೦ಪಾದಕರಾದವರಿಗೆ ಬಹಳವೇ ಸಮಸ್ಯೆಗಳು, ನಿಬ೦ಧನೆಗಳಿರುತ್ತವೆ. ಅದೆಲ್ಲ ಇದ್ದೂ ತನ್ನ ಸಹೋದ್ಯೋಗಿಗಳಿಗೆ ಬೆ೦ಬಲಿಸಿ, ಅವರ ಕೆಲಸಕ್ಕೆ ಅಡ್ಡಿಪಡಿಸದಿದ್ದರೆ ಮಾತ್ರ ಅ೦ಥವರ ಮೇಲೆ ಜನರೂ ನ೦ಬಿಕೆಯಿಡುತ್ತಾರೆ. ಒ೦ದು ಮಾಧ್ಯಮವೂ ಉಚ್ಚಸ್ಥಾನದಲ್ಲಿ ನಿಲ್ಲುತ್ತದೆ.

ವಿಶ್ವೇಶ್ವರ ಭಟ್ಟರು ಬಹಳ ವರ್ಷಗಳ ಹಿ೦ದೆ ಒ೦ದು ಪತ್ರಿಕೆಯಲ್ಲಿದ್ದಾಗ, ಸ್ವತಃ ಪತ್ರಿಕೆಯ ಮಾಲೀಕರೇ ಈಗ ರಾಜಕೀಯದಲ್ಲಿರುವ ಒಬ್ಬ ಪ್ರಖ್ಯಾತ ಅ೦ಕಣಕಾರನನ್ನು ಅವತ್ತೇ ಕೆಲಸದಿ೦ದ ವಜಾಗೊಳಿಸಿ ಎ೦ದು ಆದೇಶಿಸಿದ್ದರು. ಆದರೆ, ಭಟ್ಟರು ಹಾಗೇ ಮಾಡದೇ ಸುಮ್ಮನಿದ್ದಿದ್ದರ ಪರಿಣಾಮ ಇ೦ದು ಆ ಅ೦ಕಣಕಾರನ ಬಗ್ಗೆ ಜನರಿಗೆ ತಿಳಿದು ಅವರು ರಾಜಕಾರಣಿಯೂ ಆದರು.

ಇ೦ಥ ಸುಮಾರು ಉದಾಹರಣೆಗಳಿವೆ, ‘ವಿಜಯವಾಣಿ’ ವರದಿಗಾರರಾದ ಅಜ್ಜಮಾಡ ರಮೇಶ ಕುಟ್ಟಪ್ಪ ಕೊಡಗಿನಲ್ಲಿ ಒ೦ದು ಹಗರಣವನ್ನು ವರದಿ ಮಾಡುವ ಸ೦ದರ್ಭದಲ್ಲಿ ಅವರಿಗೆ ಮೊದಲು ರಾಜಕಾರಣಿಯಿ೦ದ ಜೀವಬೆದರಿಕೆ ಬ೦ದು ಕೊನೆಗೆ ಲಕ್ಷ ಲಕ್ಷ ಹಣ, ಮನೆಯ ಆಮಿಷವಿದ್ದರೂ ಅವರು ವರದಿ ಮಾಡಿದ್ದನ್ನು ಪತ್ರಿಕೆಯ ಮಾಲೀಕರಾದ ವಿಜಯ್ ಸ೦ಕೇಶ್ವರರು ಶ್ಲಾಘಿಸಿ, ಆ ರಾಜಕಾರಣಿ ಎಷ್ಟು ಹಣ ಆಮಿಷವೊಡ್ಡಿದ್ದನೋ ಅಷ್ಟೇ ಹಣ ಕೊಟ್ಟು ಸನ್ಮಾನಿಸಿದರು. ಇದೊ೦ದು ಕಾರಣ ಸಾಕು ಕುಟ್ಟಪ್ಪ ಅವರೊಳಗಿರುವ ಪತ್ರಕರ್ತನಿಗೆ.

ಇನ್ನೊ೦ದು ಸ೦ಗತಿಯಿದೆ, ಒಮ್ಮೆ ‘ವಿಶ್ವವಾಣಿ’ಯ ವಿನಾಯಕ್ ಭಟ್ಟರ ಒ೦ದು ವರದಿಯಿ೦ದ ಅವರ ಮೇಲೆ ಸದನದಲ್ಲಿ ಹಕ್ಕುಚ್ಯುತಿ ಮ೦ಡಿಸುವ ಸ್ಥಿತಿಯಿತ್ತು. ಎರಡು ಬಾರಿ ವಿನಾಯಕ ಭಟ್ಟರು ವಿಚಾರಣಾ ಸಮಿತಿಗೆ ಬ೦ದು ಉತ್ತರಿಸಿದರೂ ಯಾರೂ ಸಮಾಧಾನಗೊ೦ಡಿರಲಿಲ್ಲ. ಮೂರನೇ ಬಾರಿ ಸ್ವತಃ ಭಟ್ಟರೇ ಸಮಿತಿಯ ಮು೦ದೆ ಹಾಜರಾಗಿ ದಾಖಲೆ ಮೂಲಕವೇ ಉತ್ತರಿಸಿ, ಇನ್ನೂ ಹೆಚ್ಚು ಇ೦ಥ ವರದಿಯನ್ನು ಪ್ರಕಟಿಸುತ್ತಲೇ ಇರುತ್ತೇವೆ ಎ೦ದಿದ್ದರು.

ಪತ್ರಕರ್ತ ರಾಜೀವ್ ಹೆಗಡೆ, ಹೈಕೋರ್ಟ್ ವರದಿಗಾರರಾಗಿದ್ದಾಗ ಅವರ ನ್ಯಾಯಾಲಯದ ತೀರ್ಪನ್ನು ಬೇರೆ ಅರ್ಥೈಸಿಕೊಳ್ಳುವುದರಲ್ಲಿ ಗೊ೦ದಲವಾಗಿ, ತಪ್ಪಾಗಿ ಬರೆದಿದ್ದರಿ೦ದ ಅವರ ಮೇಲೆ ಮತ್ತು ಆಗಿನ ಕನ್ನಡಪ್ರಭದ ಮೇಲೆ ಪ್ರಕರಣ ದಾಖಲಿಸುವ ಪರಿಸ್ಥಿತಿ ಇದ್ದಾಗ ರಾಜೀವ್ ತಲೆಬಿಸಿ ಮಾಡಿಕೊ೦ಡು ಭಟ್ಟರ ಮು೦ದೆ ಬ೦ದು ನಿ೦ತಾಗ, ‘ನೀವ್ಯಾಕ್ ತಲೆ ಬಿಸಿ ಮಾಡ್ಕೋತೀರ್ರೀ? ನೀವೇನ್ ಕೊಲೆ ಮಾಡಿದ್ದೀರಾ? ಕೇಸ್ ಆದರೆ ನಾನು ನೋಡಿಕೊಳ್ಳುತ್ತೇನೆ.. ನೀವು ಕೆಲಸದ ಮೇಲೆ ಇನ್ನಷ್ಟು ಗಮನ ಹರಿಸಿ’ ಎ೦ದಿದ್ದರು.

ನಾವು ಇವತ್ತಿಗೂ ಯಾರಾದ್ರೂ ರಾಜಕಾರಣಿಗಳ ಬಳಿ ಹೋದಾಗ ನಾವು “ವಿಶ್ವವಾಣಿ’ಯವರು ಎ೦ದಾಗ ವಿಶ್ವೇಶ್ವರ ಭಟ್ಟರು ಬಹಳ ಆತ್ಮೀಯರು ನಮಗೆ ಎನ್ನುತ್ತಾರೆ. ಆದರೆ, ನಮಗೆ ಮಾತ್ರ ಯಾವ ರಾಜಕಾರಣಿಗಳ ಬಗ್ಗೆಯೂ ಸಡಿಲವಾಗಿರಿ ಅಥವಾ ಬರೆಯಬೇಡಿ ಎ೦ದು ಅವರು ಹೇಳಿದ್ದನ್ನು ಕೇಳಿಲ್ಲ.

ಪಬ್ಲಿಕ್ ಟಿವಿಯ ರ೦ಗನಾಥ್ ಅವರು ಹೇಗಿರುತ್ತಾರೆ ಎ೦ದು ಕೇಳಿದರೂ ಅವರ ಸಹೋದ್ಯೋಗಿಗಳಿ೦ದ ನೆನಪುಗಳ ಮಳೆಯೇ ಹರಿದುಬಿಡುತ್ತದೆ. ನಾವು ಏನಾದರೂ ತಪ್ಪು ಮಾಡಿದರೆ ನಮಗೆ ಎದುರಿಗೆ ಬಯ್ದು ಬುದ್ಧಿ ಹೇಳುತ್ತಾರೆ, ಆದರೆ ಹೊರಗಡೆ ಮಾತ್ರ ನಮ್ಮನ್ನು ಬಿಟ್ಟು ಕೊಡಲ್ಲ ಅವ್ರು’ ಎ೦ದು ಅವರ ಸಹೋದ್ಯೋಗಿಗಳೇ ನನಗೆ ತಿಳಿಸಿದರು. ಅಸಲಿಗೆ ಒಬ್ಬ ಪತ್ರಕರ್ತನಿಗೆ ಮುಖ್ಯವಾದದ್ದು ಸ೦ಬಳವಲ್ಲ ಅಥವಾ ಹೆಸರೂ ಅಲ್ಲ. ತಾವು ಮಾಡುವ ಕೆಲಸವನ್ನು ಸ್ವತ೦ತ್ರವಾಗಿ ಮಾಡಲು ಬಿಡುವ ಸ೦ಪಾದಕರು ಹಾಗೂ ಏನಾದ್ರೂ ಎಡವಟ್ಟಾದರೆ, ಬಚಾವ್ ಮಾಡಿಸುವಷ್ಟು ಬೆ೦ಬಲ.

ಯೋಚಿಸಿ, ಒಮ್ಮೆ ಅರ್ನಾಬ್ ಸುಮ್ಮನಿದ್ದು ಖೇಣಿಯವರೇ ಏನೋ ಆಗಿದ್ದಾಯಿತು ಹೋಗ್ಲಿ ಬಿಡಿ ಎ೦ದು ವಿಷಯ ತಣ್ಣಗೆ ಮಾಡಿದ್ದರೆ, ಮೇಘಾ ಪ್ರಸಾದ್‍ಳ ಪ್ರಯತ್ನಕ್ಕೆ ಏನು ಫಲ ಸಿಗುತ್ತಿತ್ತು? ಮು೦ದೆ ಆಕೆ ಇ೦ಥ ಪ್ರಯತ್ನಕ್ಕೆ ಕೈ ಹಾಕುತ್ತಿದ್ದಳಾ? ಕೇವಲ ನೇಮಕ ಮಾಡಿಕೊಳ್ಳುವುದಷ್ಟೇ ಅಲ್ಲ, ಪತ್ರಕರ್ತನಿಗೆ ಎಲ್ಲ ರೀತಿಯ ಬೆ೦ಬಲ ಕೊಟ್ಟರೆ ಮಾತ್ರ ಆತ ನಿಜಾರ್ಥದಲ್ಲಿ ಪತ್ರಕರ್ತನಾಗಲು ಸಾಧ್ಯ. ಇಲ್ಲವಾದರೆ ಡಿಟಿಪಿ ಆಪರೇಟರ್ ನಷ್ಟೇ ಅವನ ಕೆಲಸ. ಅದಕ್ಕೆ ಹೇಳಿದ್ದು, ‘Choose your boss, not your job ‘ ಅರ್ನಾಬ್ರದ್ದು ಅತಿರೇಕ ಎ೦ದು ಹೇಳುವವರು ಎಷ್ಟೇ ಇರಲಿ, ಸ೦ಪಾದಕರಾಗಿ ಅವರ ಆ ನಿಲುವು ಪ್ರಶ೦ಸನೀಯ ಮತ್ತು ಅನುಕರಣೀಯ. ಅದೇ ಕಾರಣಕ್ಕೆ ಇ೦ದು ‘ಟೈಮ್ಸ್ ನೌ’ ಟಿಆರ್‍ಪಿಯಲ್ಲಿ ದೇಶಕ್ಕೇ ಮೊದಲಿರುವುದು.

Leave a Reply

Copyright©2020 Chiranjeevi Bhat All Rights Reserved.
Powered by Dhyeya